ტექნიკური ინსპექტირება სავალდებულოა და მისი ფასი 150-დან 250 ლარამდე მერყეობს.

საქართველოში ბუნებრივ აირზე მომუშავე ავტომობილების შემოწმება დაიწყო.
ტექნიკური ინსპექტირება სავალდებულოა და მისი ფასი 150-დან 250 ლარამდე მერყეობს.
შემოწმებას რამდენიმე კომპანია განახორციელებს. იმ შემთხვევაში თუ 2017 წლის პირველ იანვრამდე ბუნებრივ აირზე მომუშავე ავტომობილების მფლობელები დათვალიერებას არ გაივლიან - დაჯარიმდებიან.
კობა სახეჩიძე წელიწად ნახევარია საწვავად ბუნებრივ აირს იყენებს. ალტერნატიული საწვავის გამოყენების გადაწყვეტილება, შედარებით დაბალი ფასის გამო მიიღო. ავტომობილის მფლობელი ამბობს, რომ მანქანაში დამონტაჟებული ბუნებრივი აირის ავზს 15 წლიანი ვადა აქვს, თუმცა სავალდებულო შემოწმების შესახებ ამ დრომდე ინფორმაციას არ ფლობდა.
ინფორმაციის ნაკლებას უჩივის მძღოლების უმრავლესობა. ავტომანქანის მფლობელები ინსპექტირებას სავალდებულოდ მიიჩნევენ, თუმცა აქცენტს შემოწმების ხელმისაწვდომ ფასზე აკეთებენ.
ავტომანქანების ტექნიკური ინსპექტირების საფასური 150 ლარიდან 250 ლარამდე მერყეობს. მას ამჟამად ორი კომპანია შპს "აირბალონი" და შპს "გაზინჟინერი" ახორციელებს. ინსპექტირების გავლის შემთხვევაში, ავტომანქანის მფლობელი სპეციალურ სერთიფიკატს 3 წლის ვადით მიიღებს.
მძღოლები, რომლებიც შეუმოწმებელი ავტომობილით იმოძრავებენ 100 ლარით დაჯარიმდებიან. საჯარიმო სანქციის აღსრულება შინაგან საქმეთა სამინისტროს პრეროგატივაა.
შპს "ეკოტრანსპორტცენტრის" ხელმძღვანელი ბუნებრივ აირზე მომუშავე ავტომანქანების კონტროლს მიესალმება, თუმცა ფიქრობს, რომ ავტომობილების ნაწილის შემოწმება სასურველ შედეგს ვერ მოიტანს.
გაზზე მომუშავე საზოგადოებრივი ტრანსპორტის და 24 წელზე მეტი ავტომანქანების ისპექტირება სავალდებულო 2017 წლის პირველ იანვრამდეა.