პროკურატურა შსს და ომბუდსმენის აპარატი სამართალდამცველთა მხრიდან შესაძლო გადაცდომის საქმეს იკვლევს.

ოჯახი აცხადებს, რომ  23 წლის ირაკლი ქაჯაია სამართალდამცველებმა 26 ივლისს, კლუბიდან გამოსული დააკავეს და მას ფიზიკურად გაუსწორდნენ. რის გამოც ჩამტვრეული აქვს ნეკნი.

ბათუმის საქალაქო  სასამართლომ ირაკლი ქაჯიას შუამდგომლობა პროცესის გადადების თაობაზე დააკმაყოფილა  და პატიმრობიდან ხელწერილის საფუძველზე 4 დღით გაათავისუფლა.

31 ივლისს, კი მას ადმინისტრაციული სანქციის სახით 7 დღიანი  პატიმრობა შეუფარდა.

ნინო დუმბაძემ შვილის მაისურზე სისხლის ლაქები პოლიციაში გადაყვანის შემდეგ აღმოაჩინა. ამბობს, რომ დაკავებამდე ირაკლი ქაჯაიას ფიზიკური დაზიანებები არ აღენიშნებოდა. 26 ივლისს, ის  ერთ-ერთი ღამის კლუბიდან გამოსული, ნასვამ მდგომარეობაში მყოფი პოლიციის მეექვსე განყოფილების თანამშრომლებმა წვრილმანი ხულიგნობის ბრალდებით დააკავეს.

ირაკლი ქაჯაიას  სხეულზე  ფიზიკური დაზიანებების კვალს რეფერალური საავადმყოფოშიც ადასტურებენ.

ირაკლი ქაჯაიას ინტერესებს „საქართველოს ახალგაზრდა იურისტთა ასოციაცია“ იცავს. ადვოკატი, გამოძიების დასრულებამდე მე-6 განყოფილების ხელმძღვანელი პირებისთვის უფლებამოსილების შეჩერებას ითხოვს.